港股噚日主板成交666億元，呢個魔鬼數字反映咗交投縮減之餘，原來亦顯示大市藏殺機，噚日只要唔屬於舊經濟股份，就跌到趴喺度。
單計騰訊（700），股價跌4.9%，前兩日反彈仍然受制保歷加通道中軸（594.2元），噚日急跌，可能反映股價已由強轉弱。另外，騰訊股價噚日跌低過3月14日大成交日嘅收市價，象徵大成交質低股價後，沽壓又嚟過，情況不太樂觀。銀娛（027）情況一樣麻麻，近兩個月高位表現反覆，但最近個幾星期喺保歷加通道下軸掙扎，有短線破底下跌嘅可能。

整體大市走勢偏弱

近期係就係有一批舊經濟股份好難得回穩，你計建行（939），近3日反彈到好似勁一勁，原來由低位升到上嚟，幅度只係得嗰半成，前排騰訊只要強勢一日，升幅都唔止啦，今時今日啲投資者對呢啲升幅點會有胃口。再睇隻綠城（3900），仲慘，說好的舊經濟股反彈呢？佢股價噚日一跌，又番去52周低位左右，一個字：「弱」，整體大市，其實點計都偏弱。
手機股逐隻睇走勢亦相當差，酷派（2369）業績衰，股價3日跌兩成好正常，但係TCL通訊（2618）噚日洗倉式下跌8.9%，通達（698）配股亦插9.5%。惟獨隻信利（732）噚日仲有得升1.8%，報5.03元。
回想起聯想（992）楊元慶講過，現時內地手機市場係全球競爭最激烈市場，晉佳覺得，佢講呢番話似乎係向市場發預警，未來因為市場競爭劇烈，即使收入可能上升，但利潤率好難keep住唔跌。你睇酷派，舊年收入升超過三成，雖然毛利率上升，但都係得13%唔夠，仲要被銷售開支急升蠶蝕，令盈利只升7%，同時未來面對小米等競爭對手強到咁，場仗實在太難打。
如果同手機股相比，做手機mon嘅信利可能情況好啲，佢主要客戶有Samsung、SONY、TCL通訊等等，單睇舊年盤數，收入升67%，毛利率由12.6%升到14%，純利升1.28倍，至16.2億元，每股盈利57.43仙，至少睇唔到犧牲利潤率嚟搶生意嘅情況。
信利之前曾經公佈營運數據，2月份未經審核綜合營業淨額12.62億元，按年升57%。總計頭兩個月，營業淨額27.93億元，按年增加37.3%。收入增長未見到舊年咁勁，但暫時未到頂。
信利市盈率唔夠9倍，係一般工業股嘅估值，仍低於佢過往20年平均市盈率11倍，市場估值算保守，反而為股價提供咗防守性。佢有個好處，就係新經濟股又新唔晒，舊又舊唔晒，兩邊洗倉都可以唔關佢事。
睇圖，佢近幾個月喺4元樓上跌唔落，近期回復一浪高於一浪嘅走勢，成交亦見增加，算係近期較好選擇，可分段吸，博後市個股唔係全線跌，佢就有條件破頂，上番歷史平均市盈率，可睇6.3元。

晉佳
本欄逢周三刊登