羅理雅這天煞科賽頭場已贏徐廐「金磚五國」，之後一路冇再贏馬，直到尾場第十一場二班1400米佢再發威，夥拍葉廐「隨心隨意」呢匹新座騎克服133磅困難，拉士於外叠如飛殺上爆出20倍冷Win，捧走香港馬主協會錦標埋齋，全日包辦頭尾糊起孖唞暑。

「隨心隨意」馬主乃貌似王苑之的後生女陳穎怡，此駒上次贏馬數到前年11月尾，事隔大約20個月，今仗終於重響勝鼓，兼贏出本馬季最後一場賽事。「隨心隨意」服役累積七捷，兼繼2013年後再次摘下香港馬主協會錦標。

今場二、三名分別由新勝馬「辣得很」（蔣嘉琦）及大熱門「無敵飛龍」（潘頓）取得，而末段出現嚴重擠阻，衝得最行的落飛馬「比卡超」冇位出，田泰安將馬頭抽到扭曲衝線跑梗頸四，四重彩派四萬八千幾。

雷神尾場騎「豈等閒」落敗，不過仍無阻佢以五冠兩亞兩季累積80分封王，全季埋單更以168場頭馬蟬聯冠軍騎師寶座，刷新由自己保持的騎師在港一季贏馬最多紀錄，至於其好拍檔蔡約翰則以68Win重奪失落三季的冠軍練馬師殊榮。