【新增內容】

有線大地震，新老闆上場，上月即裁減娛樂台人手達20多人。今日有線召開記者會，有線營運總裁梁淑儀指為配合公司新部署，娛樂台模式會轉變為與外判公司合作，制作創新節目為主。在場有記者問到會否有計劃再裁員，主席邱達昌則指：「依個唔答。」

據悉有線合約藝人只餘下約10人，盧頌恩（妹頭）喺有線工作七年，合約至明年中，佢今日接受《蘋果》電話訪問時話：「對上一兩個月公司大地震，好多同事last day，都好唔慣。但呢啲係公司新發展，唯有等公司新部署。我哋簽約藝人都要習慣下公司嘅新模式，外判節目就睇吓可唔可以加插到，因為管理層都話只要適合，會裏應外合做好啲節目。依家都係希望新公司越做越好，消息傳咗出嚟都好，相信公司嘅目標同立場會更清晰。其實我加入公司7年，呢段日子都算係最難適應，好大改變，希望嚟緊越變越好。」

另外，已離開奇妙同有線接近一年嘅簡采恩亦表示：「 當時台前幕後一直都好期待奇妙開台，但一路都有唔少負面新聞，接二連三裁員，大家都好擔心，唯有做好自己。雖然離開咗，但一直都好關心舊公司同埋舊同事嘅動向，其實有心做嘅製作人同幕前都有好多，就算去咗唔同崗位都仲有一團火，希望公司變化會關注多啲為公司拼搏多年嘅員工。」

同樣係有線合約藝人鄺芷凡坦言：「見到啲同事離開公司，我當然都有唔捨得啦，但我作為藝人，盡力做好自己本分係首要條件，公司有新部署，有新方向，未必一定係壞事，可能係好事呢！始終我都係藝人，唔係管理層，我都唔識咁多，總之我會盡量配合公司安排。」

精選娛聞，喺晒《娛果》
http://fb.com/appledailyent