馬主H等人去年參加咗馬主H組織嘅一個賽馬團體，隻馬落到第五班後，評分已低，低位反彈，已贏咗兩場，馬主H話贏一場擺一圍，贏兩場擺兩圍，贏三場就要擺三圍酒嚟慶功。年初九晚，馬主H在沙田馬會凱旋廳搞慶功宴，果然擺兩圍。左丁山與評馬人肥仔豪，好吟詩作對嘅評馬Y都有份出席。馬主H係會計師出身，來自已執笠關門嘅AA，現在係上市公司主席，最鍾意賽馬與踢波，每逢贏馬或贏波就高興到不得了。

馬主H有幾位友好係利物浦大學校友，呢晚食飯講完馬就講波。生物醫學教授Y話自己在利物浦大學時，球隊有魯殊、杜格利殊、班尼士等球星，幾乎逢戰必勝，佢每逢有主場球賽就去睇波，窮學生買「企位」門票，只需兩鎊半，十分便宜。巨型會計師樓稅務專家K在利物浦大學低教授Y幾班，剛好趕到利物浦最後威風嗰兩年，同樣熱捧紅軍。左丁山笑佢哋：「今日情況差好遠喎！賭波球迷成日講：若要好路數，勿買利物浦，隊波真係唔掂。」稅務K唉聲嘆氣咁話，賓尼迪斯接杜格利殊手，出任利物浦領隊後，一直衰到家，但亦有一場經典大賽，令擁躉開心一世嘅。左丁山即刻猜中：「係唔係二○○五年在土耳其反勝AC米蘭贏歐洲冠軍球會盃嗰場？」稅務K：「梗係啦。二○○五年冇人估到我哋會贏嘅，知道進入決賽之後，我哋喺香港周圍撲飛，碰啱利物浦大學校長來港籌款，大家靈機一觸，班咗兩張門票來港拍賣，所得款項捐畀大學，我以五位數字拍到一張。睇波好辛苦o架，決賽之日下午到達伊斯坦堡，晚上九時睇波，上半場已輸咗○比三，我哋絕晒望，唯有一齊不斷唱"You'llneverwalkalone"，大概球員受到感染，下半場開始作絕地反攻，追和三比三，最後憑射十二碼贏咗。我哋高興到發晒癲，呢場波嘅經驗真係一世難忘。散場時已過咗午夜，瞓唔着，早上七點就趕到機場搭飛機返倫敦，你話幾刺激呢！」曾經滄海難為水，唔怪得稅務K與教授Y家睇利物浦踢波得個字，左丁山亦是如此，買一條三串一，阿士東維拉、利物浦、羅馬勝，結果利物浦只能與曼城踢和，斷咗纜，話過以後唔買利物浦。