馬小九事件，繼續撲朔迷離！繼中聯辦肥高表態話歡迎老朋友馬小九來港之後，又輪到保安局局長李少光自動引爆話從來冇拒絕過馬小九嘅入境簽證！
咁即是點？係嚟定唔嚟得？唔係馬小九想嚟香港，而係「民間」邀請佢，若然唔嚟得，咁點解「民間」又要邀請佢？尤其係當呢個「民間」，唔係支聯會，又唔係黑社會，唔係長毛，亦唔係劉慧卿，而係有頭有面嘅香港大學，重有，一向愛國愛黨、同中央人民政府有特別天地線嘅「百人會」創辦人陳啟宗！
朗尼．陳一向係中央人民政府在港認可喉舌之一，大罵民主黨，痛鏟李柱銘，由朗尼．陳嘅「百人會」邀請馬小九來特區，嘩，重同美國啲市長平起平坐，有鬼佬貴賓襯托，擺明係同馬小九競選台灣總統，跟住再做首任台灣特首增威添勢，點解突然之間反面？
到咗摑完一巴嘞，又輪到吳康民解畫，話唔畀馬小九來港係保護佢，希望佢唔好被定性為裏通外國、親中賣台，等佢下屆做到總統，跟住開城門迎接解放軍！