年幾前已經話係最後一次參選嘅阿基，每次再返出嚟選都有苦衷嘅。今次嘅苦衷係因為民主派想搵人去白區挑戰建制派，咁佢咪好似捱義氣咁出嚟咯，仲話同區嘅素人後過佢出，又唔肯傾、又堅持喺該區出參選，咁咪一句參選係每個人嘅政治權利作結。
咁點解硬係要撞區？佢話「可能馮檢基係蜜糖啦，好多嘢『嬲』到返嚟」，又確實係幾吸嬲嘅。咁到底阿基算係乜派、邊路人馬？佢話自己係「無政黨嘅民主派」，民主派呢幾個月都投入反送中，問阿基反送中嗰陣去咗邊？佢話「er……我一路都係er……有參與一啲er……民陣嘅遊行」。原來係咁，唔該晒！而網民對阿基咁講好大意見，話班「老人家」好似何俊仁、李卓人都敢接民陣手，冇不反對通知書都出嚟帶頭遊行，求其話有去民陣遊行就叫參與咗？