【技不如人】受傷有網民幸災樂禍 麥紫莉:上得擂台就應該認真打
日本麥紫莉G1格鬥會II
仍身在日本為ViuTV節目《G1格鬥會II》拍攝外景嘅麥紫莉(Chili),噚日雖然左膝受傷要入院接受治療,但今日Chili依然繼續參與拍攝,同其他參賽者喺海邊着泳裝示人,兼有滑浪教練教授眾人滑浪技巧。
Chili噚日喺同余智嘉(Chika)嘅對戰中落敗兼受傷,仲要即時送院治療,見到當時Chili喊晒口表情非常痛苦,令人擔心佢傷勢好嚴重,經治療後即日已經出院,要坐輪椅到場仲準備咗柺杖,左腳則包滿紗布,問到傷勢時,佢話:「骨冇事,醫生話可能係十字韌帶問題,照咗X光,佢叫我返香港再睇!」Chili話會照原定計劃同大隊一齊26號返香港:「會照拍,盡量淨係影到隻手囉,對腳就盡量都唔好,我都想拍落去嘅!」
講到當時受傷情況,佢話:「覺得好痛,郁唔到!但好想繼續打落去,唔想輸。其實我輸俾Chika後,聽講今次係淘汰賽,應該就唔會繼續!」練咗咁耐第一場就慘敗兼受傷,覺得值唔值?佢話:「盡咗力ok,畢竟對手太強,我自己技不如人!」Chili又話唔認為Chika出手重:「上得擂台就應該認真打,受傷後唔止係對手,其他人都好關心同好照顧我!」
至於噚日受傷報道出街後,唔少網民幸災樂禍, 佢話有睇大家留言:「我又覺得唔緊要嘅,你唔能夠控制所有人諗乜嘢,但亦有網友冇私底下問我有冇事,想我快啲好番 !」佢強調冇後悔參加比賽,亦希望可以轉形象上洗底 ,但對於外界嘅反應差,問到會唔會覺得前路難行,佢話:「預咗係會咁,係難搞啲,咁盡力去做囉!」