李國章十足個大細路,你嬲佢都無謂。佢嗰晚壓軸上台演講,真情流露,又乘機喺度諷刺對面海間大學,話人哋啲教授唔識得欣賞中大同學上課活躍嘅一面,真係乜都敢同你講笑。佢當日答班尊貴議員自己一心二用,認真為老不尊,俾八方笑佢係金庸子弟,成個周伯通,原來佢以前真係寫咗一篇文講周伯通,有時間要拎嚟拜讀一吓。
醫學院慶祝成立二十五周年,李局長好似回到老家一樣咁雀躍,八方問佢既然成世為中大醫學院不遺餘力,不如再捱義氣更上一層樓,做埋政務司司長,接肥龍棒,咁一定可以幫中大爭取更多資源。點知局長反應好大,話大家乜都預佢一份,CS又係佢,CE又係佢,佢點可以一身二用?局長咁醒,有乜唔得,咪先做CS,再做CE囉。點知坐同一張枱嘅新聞秘書阿May話,局長想多做一屆,局長夫人都未必批准,何況仲要話要做得更高級。
傳真︰2623-9278
電郵︰
[email protected]