重磅藍籌滙豐控股（005）噚日公佈業績，差強人意，股民沽咗先講，唔知滙豐係想轉移視線，還是純粹畀啲八卦料娛樂大家，佢哋噚日喺facebook專頁爆料，話中環滙豐總行地底確實有條神秘隧道㗎。
坊間一直有聞，滙豐中環總行地下有地道，直通禮賓府（前港督府），係英國人喺殖民時代作最壞打算，有乜風吹草動，就由地道運走金條現鈔返英國，後來先知道係環保設計，只係從未見過隧道內貌。

引入海水為大廈降溫

滙豐喺fb上載一張隧道相，入面有多條粗壯水管，呢度就係傳聞已久嘅滙豐神秘隧道，主要通往大海，作用係抽入海水，為大廈降溫。炎夏時，每秒鐘引入1,000公升海水，一日引入嘅海水，足以注滿34個奧運會標準泳池。唔講真係唔知，大廈用呢種系統去降溫，唔係開冷氣咁簡單，又長知識了。不過，滙豐提供呢個小知識，依然要俾人狂鬧。滙豐銀行前副總經理劉智傑（劉Sir）應該係愛之深，恨之切。喺自己fb評滙控業績，簡而精咁鬧份業績「非常之差」。
滙控主席范智廉今年退休，市場不時傳出邊位可能係下任主席，至今都冇個傳聞係真，劉Sir就話，世上能人雖多，有能力帶動滙控整體表現者屬於「稀有動物」咁話。

李華華
mailto:[email protected]