有政壇教父之稱嘅「大Sir」鍾士元當年為咗香港前途撲出撲入費盡心機同中英政府表達意見，雖然俾鄧小平當面鬧係「孤臣孽子」但亦贏得唔少掌聲，後來亦為北京接納，到𠵱家佢退咗落嚟多年仍然深受政界中人尊敬。
話說政壇唔少人係大Sir帶住出嚟，李鵬飛係徒弟之一，大Sir噚日出席飛哥嘅電視節目錄影。大Sir已屆90高齡，行動有少許不便，但精神同健康算係非常好。佢噚日講到中國崛起可能會受其他國家敵視呢個話題時中氣十足，言論仲好盞鬼，「地球上點都會有競爭㗎喇，好似以前冷戰時美蘇兩大國咁動口不動手就冇問題唔使怕……除非有外星人要嚟地球搞事，世界各國先會聯合一齊對付外敵，否則大家都好難唔爭餐死。」

「最緊要長命」

講到香港政制，大Sir話，呢個係目前首要處理嘅問題，又話由於特首喺立法會冇固定支持票，搞到呢十年嚟好多基建政策都進退不得，得個講字冇建樹。佢又重提英美國家行之已久嘅兩院制，認為兩院制有利香港平衡發展。當飛哥問佢有咩嘢教訓要話畀後輩聽時，大Sir有啲招積咁話：「冇咩嘢要教訓，最緊要長命！」八方雖然後生啲但都係咁諗，希望同大Sir、飛哥都喺有生之年，睇到落實雙普選。