【本報訊】近年本土派得到不少年輕人支持，他們更揚言要香港獨立，與中國切割。陳日君樞機表明無法認同本土、港獨，強調中港兩地密不可分，中港爭取民主「冇乜分先後，邊度先成功就成功」，香港亦不可能獨立。
陳日君談起傘運中不願退場的年輕人，依然有氣，明言會與本土派「各有各做」，「我想溝通佢哋都唔聽我講啦，我又唔係救世主，冇機會我都唔會主動講，費事呀，又要俾人鬧，我唔怕俾人鬧，但無端端俾人鬧都唔使㗎吓嘛」。

指制度製造水客

陳又不明白本土派要與中國民主發展完全割裂的論據，「（兩地民主）冇乜分先後，邊度先成功就成功，你以為香港可以獨立咩？𠵱家河水氾濫，井水會被遮住，中國咁大，香港咁細，你以為你擺脫得到咩？」他說：「呢啲嘢𠵱家冇人夠膽講㗎，得我一個講㗎咋。」
陳以本土派以連串反水貨客行動為例，指理解內地客對民生的影響，但民間不應一味反中國，「你話佢影響你生活，騷擾咗我哋，對佢哋好反感，反大陸情緒梗係有啦，但佢哋都係制度製造出嚟，好可憐，我哋對佢哋應該同情多過反感」，又指若內地客行為真的損害港人利益，「政府應該有措施，用公道、國際慣用嘅方法去處理」。
至於警察暴力對待巿民，他認為應把矛頭指向警隊領導，而非前線警員，前線警員犯錯，仍應先以法律制裁，包括暗角七警（圖），「打人嗰啲未處理㗎，我哋要大聲講㗎，咁明顯打人，佢仲話要諮詢先決定告唔告」。
■記者張嘉雯