有幾個馬房，自己覺得幾難搞，姚本輝算是其中之一，或者是無乜緣吧！但今朝見莫雷拉再試「天心星」，又令我有衝動，首先向來鍾意此駒休後復出，這次休息兩個半月復出，這期間，只要見到「天心星」操練，都會睇多兩眼，心也想，幾時先跑呢？早些時候，轉交莫雷拉過檔，一課試完再一課，埋門再試埋大閘，大致估到會報這次的三班1000米，周一看報名，果然真係跑呢場，到昨日排位，梗係第一時間睇下排檔，若排一、二檔，講乜都無用，睇見排七檔，都算放心。
掌握到「天心星」埋門進度，對四月初短暫停操，因而放緩操練程序，全不擔心，自四月尾至今，要做的工夫全都做齊，今月中試大閘後，原以為未必會再跳，今朝做埋最後試跑，且唔係由助手試的例常課期，反由莫雷拉親自再加操，騎師夠緊張，「天心星」表現又對辦，今周日再跑同程，肯定唔會好似上次咁玩留後。