咪以為各路當選人可以喺選舉過後即刻唞一唞，皆因勝選就係另一個工程嘅開始，就係巡遊各區去謝票嘞。獲選民投票支持，梗係要答謝下，好似港島區太古城選民，唔介意深宵排長龍投票，最終力保泛民三席，整體得票力壓建制，真係可喜可賀。所以勝選嘅公民黨陳淑莊Tanya同民主黨許智峯，今朝都去到太古城謝票。

查實許智峯本來係同喺建築、測量、都巿規劃及園境界勝出嘅新丁姚松炎，以及喺資訊科技界力保不失嘅莫乃光，約埋一齊聯合謝票，而咁啱Tanya今朝都到太古城喎，佢自己都笑笑口話，「冇約都撞到兩位成功擊退保皇黨嘅議員－姚松炎和莫乃光，好開心」，佢話希望日後可以喺不同議題上，多多合作！

喺太古城得票率排第二嘅許智峯，亦拎住個寫有「感謝支持」紙牌向選民say thank you。