踏入牛年，劉鑾雄（大劉）接連喺前日同噚日同愛將甘比去灣仔富豪飯堂福臨門開飯，相當得寵。大劉女友呂麗君自然要裝備自己，佢噚日就約朋友狂掃內衣。噚日下晝3點幾，呂麗君同女伴現身中環ifc嘅連卡佛，佢哋主攻英國性感名牌內衣AgentProvocateur，仲大有斬獲，每人買咗一、二袋先走。
早前有傳呂麗君有咗BB，但噚日見佢身材纖瘦。記者問佢係咪又有咗？佢初時笑笑口冇答，之後就話：「我點知呀？」呢個答案令馮仁昭莫名其妙。記者又問呂麗君會唔會生多個陪囡囡盈盈？佢話：「點解咁問呢？」咁點解唔見佢陪大劉出街食飯？呂麗君笑而不答走咗。

嘉欣好腳頭

呂麗君買嘅內衣，名模姬蒂摩絲（KateMoss）都做過代言人，主打funnysexy路線，帶有SMfeel，關之琳都係客仔。馮仁昭覺得呂麗君可以買定多幾套增添閨房樂，增加懷孕機會，咁就唔使係咪大肚自己都唔知啦。
呂麗君掛住扮靚，大劉就約媽咪同甘比食晏，佢哋前後腳去福臨門，大劉仲叫保安將利是派畀記者。至於大劉舊愛李嘉欣，盛傳懷孕嘅佢前日陪老爺奶奶入馬場，仲好腳頭帶挈老爺許世勳拉兩次頭馬，大約有200萬彩金落袋。賽事完結後，許晉亨就送嘉欣返去睦誠徑寓所。