「香港創業係全世界最困難，但我想做一隻香港人嘅酒，為香港做返一件有意義嘅事。」今年38歲的調酒師張寅傑Kit，跟當了10年公立醫院護士，今年34歲的張穎雋Joseph是多年酒友，兩人無酒不歡，單是在訪問過程中已飲了至少4款不同的酒；某次酒過三巡後，兩人說笑要調製一款擁有香港味道的酒，結果研發兩年，終於創立本地Gin酒品牌「白蘭樹下」，以香港香蘭花做主要材料，一年後已賣出逾1.2萬枝酒，生意額近900萬。儘管目前市道欠佳，Kit卻沒有埋怨：「唔可以賴其他嘢，做生意預咗單一市場有風險，要諗其他方向，就好似香港起間酒廠係近乎不可能的事，但我哋目標係想香港製造。」

香港過去半年發生很多大事，年青人的未來捉襟見肘，有人遠走高飛，亦有人選擇留低打拼，對於釀酒行業來說，Joseph認為香港創業是世界上最難的地方：「一開頭家人反對我辭職，始終都要養家，我覺得創業本身冇希望，但係大家去做一啲嘢出嚟，之後喺入面搵希望。」嗜酒的Joseph在調酒班中認識了現在的拍檔阿Kit，一次醉酒中想起的概念，最終於變成白蘭樹下這個現實，Kit笑言：「我哋醉醉哋話想整隻香港人嘅酒，點知第二日起身就真係去做，慢慢去調酒就造咗呢隻Gin酒。」

Kit做了調酒師十幾年，對酒瞭如指掌，但他貪玩，幸好Joseph執行力強，說做就做：「我哋互補，Joseph坐低做電腦前嘅嘢，我負責出去。」Kit曾經為客人以雞蛋花調酒，一試難忘，於是造香港酒，便想起用花瓣：「講起白蘭花，相信大家都會諗起香港，咁呢隻酒先代表到香港。」為了造酒，除了用10蚊3朵的白蘭花，更用了龍井、當歸、壇香、15年陳皮等香港材料，然後再運到荷蘭蒸酒：「單純計浸泡材料3至4日左右，然後需要裝瓶，啱啱蒸起嘅酒唔可以即刻攞出嚟賣、即刻飲，需要畀時間佢settle，大約4至5星期。」單是研發便花了兩年時間，Joseph初期兼職創業，港荷兩邊走，但當正式投產後，便辭掉護士工作。2018年底初推出時以類似眾籌方式銷售，首批貨2000枝很快便沽清，一年內便賣出逾萬枝，目前更賣逾1.2萬枝，除了網上平台銷售，更會放在酒吧及部份零售點寄賣，不過一枝「白蘭樹下」官網售價高達728元，較一般Gin酒貴近一倍。

兩人堅持以本地材料，再運往荷蘭蒸酒，成本自然較其他品牌更高，儘管目前已收回當初過百萬的投資成本，但要達成下一個目標，在香港設酒廠仍是遙遙無期，Joseph感嘆指：「香港做生意係好難，尤其土地問題，如果要開間蒸酒廠，大約5,000呎啦，香港租金10萬起，外國只係兩萬。第二就係牌照，我要租一個地方做工程，然後等個牌照，順利嘅話要等9個月，即係白交租9個月。」他續指，要經過8個不同的政府部門批准，例如海關、消防第五類危險品製造牌，加上其他部門，在香港設廠較外地更難：「搵投資者，佢又要計你公司值幾多錢，但開個廠有太多計唔到嘅嘢。」

社會運動持續數個月，零售業首當其衝，酒類產品亦不能幸免，Kit認為做生意要懂得變通：「呢幾個月比較深刻嘅係，做生意要有不同方法，唔可以得單一方向，要不斷諗有危機，好似當似隻酒用沉香，但因為出唔到團，改咗用壇香，創業要有backup plan，唔可以賴其他嘢。」於是兩人一早想出要將品牌衝出香港，目前已在台灣地區銷售，Joseph笑指：「我本身覺得係冇希望嘅，但而家就係冇希望當中搵到希望。」他指當初家人反對他辭去穩定的護士工作，但他認為到了30歲這個關口，不再追夢便會太遲：「而家成績算唔算對家人有交待？我唔敢講，但如果去到外國唔同酒吧，都搵到我哋呢枝酒，我就覺得有交待啦。」

記者：陳新政

採訪/ 陳新政
編撰/ 陳新政
攝影/ Gary、西
剪接、後期/ 何正生
編導/ 何正生
編審/ 楊智佳