國歌法殺到埋身，政府最快聽日（16日）向傳媒簡介國歌立法建議，始終呢條法案最大嘅戰場，都係立法會，夠唔夠票通過呢？政府一定好緊張。八方聽聞，政制及內地事務局局長聶德權近日已經孖住副局長陳帥夫出動，向民主派政黨摸底遊說，日前接見咗民主黨黨團。

唔少人都好關心，如果唔係喺播國歌現場嘅「第二地方」，冇莊嚴對待如肅立，會唔會中招？八方打探過，據知有白鴿黨員席間都就此提問，如果喺茶餐廳見到電視播國歌，完全唔理繼續食飯會否犯法，引述政府話唔會喎。

但咪以為白鴿黨咁樣就收貨，有與會者強調，當局嘅立法建議中，冇特別為言論同創作自由作豁免，咁樣已經好大鑊，分分鐘令唔少人誤墮法網，強調魔鬼在細節中，民主派必定全力應戰。