貼文宣原本係最和理非嘅活動，但近月成日有人喺連儂牆被打被斬，兇徒逃之夭夭，貼文宣嗰班就被控毆鬥，貼連儂牆成本越來越高。一位「勇武爸」就諗到一條計，令貼文宣嘅年輕人唔使再冒咁大風險，就係製作「連儂傘」喇。原理好簡單，把透明遮有八格，可以揳入唔同嘅文宣，任由大家發揮無限創意，點樣設計呢八格都得，咁帶出街就唔怕撕紙狗喇。

義賣收入捐大學學生會

勇武爸經常四出貼文宣，識到唔少後生仔，不過好彩未俾人斬過，佢話可能因為有幾個大人睇住，所以尚算安全。佢仲話啲後生仔對於貼文宣好堅持又執着，覺得連儂牆係將資訊發佈畀唔同階層嘅最佳方法，既然咁堅持，又反正已踏入雨季，所以勇武爸就諗到設計呢把傘，索性畀大家日日帶住啲文宣出街，真正將抗爭融入生活。

連儂傘暫時預計會量產1,000把，主要係送畀學生用，亦會有一部份售賣，收返嘅成本會再捐畀幾間大學嘅學生會，支援佢哋搞活動。想訂購嘅話，可到Facebook專頁「Blackbloc HongKongers」或WhatsApp 5472 3874。