盧啟賢（Calvin Lo）傳豪擲百億買下台北文華東方酒店、與廖碧兒即將成婚，但同時又傳曾與前妻因贍養費對簿公堂，近日就其財富背景非議不絕。《福布斯》曾有文章指他個人身家約17億美元（132億港元），而其致富之道在於所謂極高端「私人保險」業務。盧啟賢接受本報獨家專訪，親自拆解其巨額人壽保險網絡。

盧啟賢為人壽保險經紀公司R.E. Lee International（亞溢利國際）行政總裁，一般大眾對此公司或聞所未聞，他謂公司承做高額人壽保單，「每張保額普遍超過2,000萬、甚至1至2億美金，目標客戶係各地Top 50 families （頭50大家族），幫佢哋做Estate planning （遺產規劃）。」

盧啟賢辦公室雖然坐落在金鐘商廈，甫踏進房內，一幅莫內油畫映入眼簾，「大部份client（高資產客戶）面對嘅都係財富傳承問題，普通人投保100萬美金，to be honest 已經好大額，但對某一撮人嚟講仍然係唔夠，佢地最後係需要有一筆好大嘅現金去處理資產。」盧啟賢解釋，旗下客戶資產遍佈世界各地，惟各地稅率不同，「例如美國有40%遺產稅、日本係70%，唔準備定筆現金交稅，呢份財產3個generations已經無咗。100蚊嘅遺產，我哋係透過買70蚊嘅人壽保險去cover tax。」

簡單而言，即一名富豪買入一份壽險，身故時獲得賠償，而有關賠償須為填補遺產稅的成本。有時候，甚至可以解決「小三」爭家產問題。「有一次，個client上辦公室，長檯左右兩邊各坐一名女士旁聽，氣氛好凝重。其中一位我認得係佢太太，而另一位就好年輕，但我印象中佢哋個女應該無大得咁快......到我解釋完成份保單，我client起身走前就講咗句『咁大家滿意啦』，原來另一位係佢girlfriend。」

由於正印憂慮「小三」於富豪死後會爭奪家族財產，最終「講掂數」只讓富豪留下一份巨額人壽保險予其女友，除此之外不得分獲半點家財，亦算是富豪人壽的「另類作用」。

另一種壽險財技操作，名為「Buy-sell Agreement」，「係一間國際企業幫主席投保，主席係公司symbol，一旦有咩事，份保單係用嚟cover公司股價半日跌幅，單計保費都幾億美金。」而該筆保額為6.5億美元（約50.7億港元），是盧啟賢從業以來經手最大筆生意。

由於保額隨時上億，遠超正常保單上限，盧啟賢坦言，差不多每張保單都是度身訂造，不過，保險公司基於風險考慮，其實不易承保，而「私人保險」經紀作用正是與保險公司周旋，協調盡職調查、反洗錢等，「承保公司office喺紐約，你話你個亞洲client有咁多net worth（身家），但都要解釋到比保險公司睇呢個client係做咩生意。」他指目前2,000萬美元以內保單基本上能輕鬆批出。而根據行業做法，保險公司通常可承保的最大保額為投保人一半身家。

至於當中如何周旋，他提到其客戶除了國際城市外，亦有發展中國家，「（保險公司）通常只係擔心兩大風險——當地戰亂同投保人健康，但講真我啲客有咩事已經飛走咗，可能少少感冒已經第一時間飛去美國。基本上只要解釋到上述兩個風險，保險公司都會考慮承保。 」至於與盧啟賢合作的承保公司，他指均來自熟悉的保險公司品牌。

他笑言，外界大多只看到保險業風光一面，「通常只係見到我哋飲紅酒」，他憶述曾經到印度與當地一名富戶商談保險，由於當地衞生程度欠佳，本身已經警惕當地用水，「有一次已經連刷牙都用自己帶的Evian（礦泉水），點知只係沖涼飲到少少水，第二日都食物中毒。」

盧啟賢年逾40歲，母親李佩珍亦是從事保險，算是家業傳承，他憶述當年畢業後，「其實係想喺投資方面發展，typical想做ibank嗰類，後來亞洲高額保險需求大增，好幸運地生意擴展得好快，所以決定返香港幫手。」

翻查資料，盧啟賢的保險經紀公司R.E Lee International總部位於香港，分別於新加坡、杜拜、上海、美國西雅圖等地有分部。已故主席Robert E. Lee 自1954年於美國開始從事人壽保險業務，1979年在港開設辦事處。

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！