聖誕佳音！英國脫歐過一關、中美貿談亦過一關！不過，英國脫歐就算成事，脫歐之後先係挑戰開始，一來要同多國再傾貿易協議，二來蘇格蘭同北愛爾蘭正醞釀脱英。至於中美貿易協議，一日未簽都未作準，往績嚟睇，有鵰（deal）都會飛走。

觀乎貿易形勢，英國將會籌建以美、加、澳、紐為首嘅英語文化經濟圈，同歐盟匹比。大西洋兩岸，兩個金髮蓬頭嘅國家首腦——約翰遜、特朗普，關係勢將加強。不過，特朗普係生意佬，同佢交手，難有甜頭，睇中美首階段貿易協議就知。

根據協議，美國煞停對1,600億美元中國貨開徵15%關稅，涉及稅款240億美元；另對1,200億美元中國貨關稅由15%減至7.5%，涉及稅款90億美元；中國則承諾未來兩年購買額外2,000億美元美國貨。換言之，中國每年以1,000億美元換取減輕330億美元關稅。誰勝誰負？心照。

不過，中國亦唔算太蝕章，出口美國5,300億美元貨品中，1,600億美元貨品關稅煞停，1,200億美元貨品關稅減至7.5%，2,500億美元貨品關稅維持25%，即共付715億美元稅款，相當於總額13.5%。貿易戰以嚟，人民幣兌美元貶值11%，抵銷唔少。

周一，港股出現獲利回吐，跌0.6%，收27,508。喺中美傾掂數，加上中經會暗示明年經濟保六、聯儲局暗示明年息率不變下，市場風險胃納回升。睇技術走勢，恒指出現雙島形底，短線上望上升通道頂28,300水平，支持位睇27,300水平。

穗深城際鐵路剛於周日開通，全程只需53分鐘，有助構建粵港澳大灣區一小時生活圈。越秀房產信託基金（405）旗下8個項目，廣州佔5個，可望受惠。該股現價5.25元，息率6厘，相對香港同新加坡REITs，平均息率4厘同5.3厘，更為吸引。

割柑人
---------------------
2020年 股樓何去何從
林本利教你部署退休生活
點擊參加【林本利2020股樓部署】FAN享會
-----------------------
屬於香港人的移民攻略
立即登入【全球樓行】
Dream House零距離