支持好兄弟公開戀情
三哥勸華仔「有仔趁嫩生」
三哥與產後復出的靚靚均有個美滿家庭,難怪會為好兄弟華仔(小圖)的終身大事而着緊。
對於劉德華暗指朱麗倩是「我的天使」,有意公開女友身份,身為華仔好兄弟的苗僑偉也表示支持,更鼓勵華仔成家立室,昨日三哥在將軍澳電視城出席新劇《疑情別戀》開鏡拜神時說:「華仔朋友我梗係識,識咗好耐,係咪管家婆?我知佢係一個好女仔,都係一個好嘅管家婆,不過唔知佢係咪管華仔嘅管家婆。」
作為好朋友,好兄弟,三哥好着緊華仔的終身大事,他說:「我催佢好耐喇!我仲催佢生仔,我叫佢有仔趁嫩生,不過呢個都係我單方面,一個男人事業有成,應該有個家庭,我好鼓勵佢,不過佢自己都話結婚生仔佢會講畀大家知。」
袁詠儀(靚靚)拍攝《疑情別戀》期間,多了一個花名叫「笛子姑娘」,她說:「呢個新朵,係因為我成日催人快啲,一日到黑係咁催,所以個廠經常可以早收工。」
靚靚表示拍劇期間不停病,她懷疑因為冇拜神,所以不吉利,她說:「我真係要誠心啲,拍呢套劇係咁病,一開始就鼻敏感,鼻水係咁流,搞到鼻竇炎,然後上支氣管炎,之後連把聲都冇埋,又感冒又腸胃炎,係咁睇醫生,從來唔會claim保險嘅我,都要問保險有冇得claim,點知睇專科係冇得claim。」
採訪:楊潔雯
攝影:陳順禎