超蓮雖然多緋聞，佢多次強調o依家唔諗拍拖，想專心做嘢，睇返實證，佢真係忙緊家族喺澳洲搞酒店重建，前一排都見佢喺ig貼相「地盤妹」上身視察，另外，9月佢做咗上市公司澳門勵駿嘅非執董，所以真係唔係講講吓。

日前，超蓮現身灣仔一間開辦會計課程嘅楷博教育 (Kaplan)，據知超蓮在該處修讀ACCA，即係英國特許公認會計師公會嘅專業課程，估計佢喺呢度現身係修讀課程，而呢個專業資格，一般須時6、7年考試完成。

其實佢12年喺英國倫敦大學皇家霍洛威學院(Royal Holloway,University of London)畢業時，嗰時已講下個目標要考會計師牌（新聞連結： http://bit.ly/2gphe7H )同讀碩士，畢業後即開始執行其中一個計劃，已在倫敦同北京嘅安永會計師樓做咗兩年嘢，其間已考咗幾張paper，見佢喺ig都有po過佢返工相。據知，超蓮今年年初仲開turbo同時搭住讀埋master，o依家係返佢原校讀緊遙距課程，用遙距方式上堂，之後同講師交功課，返香港設嘅中心考試。

《蘋果》就搵過超蓮，佢表示如無意外會喺出年年尾、或後年年中碩士畢業，講到考會計師牌同碩士學位一齊讀，佢表示：「我大學開始到搵工，到讀呢啲course，都係自己嚟，阿媽完全無插手，同一蚊都冇畀過，我自己覺得，用錢都買唔到專業資格，ACCA專業會計師牌畀幾多億都買唔到，自己想讀一個專業牌，唔係因為屋企關係，同埋我爹哋有講過想佢仔女入面有一個專業會計師，我希望可以做到，所以返到嚟一次過讀，同埋留喺香港讀，可以陪多啲爹地，希望爹地見到真係攞到呢個牌，我唔想有一個遺憾畀佢。」