當年今日
關於我們

馮仁昭四圍超:千嬅超級臭狐迷暈小齊

蘋果日報 2003/10/03 00:00


楊千嬅最近同時有三套戲喺手,因此有個「楊三組」嘅新稱號,佢下個星期就要同任賢齊、鍾鎮濤(阿B)去無錫拍古裝片《美人香》。千嬅喺戲裏面飾演個全身有臭狐嘅公主,係臭到冇人埋到身嗰隻,都幾搞笑。

鬥醫術要先唔臭死
劇情係講千嬅由細到大都有超勁臭狐,好多大夫都醫唔掂,皆因佢個身臭到冇人行得埋去,咁又點醫呢!而任賢齊係一個坊間醫術好高明嘅大夫,阿B就係宮廷裏面好有名嘅御醫,兩個成日鬥醫術,小齊同阿B都好有把握醫好千嬅,只係要解決點樣埋身唔臭死。
結果喺阿B嘅悉心醫治下,千嬅啲臭狐開始冇之前咁臭,小齊就好疑惑究竟阿B點埋身醫佢,喺醫病過程中,千嬅同小齊重孕育出愛情㖭,小齊愛上千嬅後,竟然愛屋及烏,連佢啲臭味都覺得係香嘅,於是就順利醫番好佢。至於阿B當初點樣埋到千嬅身?原來阿B天生冇嗅覺,佢老婆都係個絕臭美人,所以醫千嬅就難唔到佢囉。
話時話千嬅又要拍《安娜與武林》做打女,喺《地下鐵》入面就飾演失明少女,𠵱家又要扮臭狐公主,同時間兼顧幾個角色,真係好易精神分裂,不過都係佢磨練演技嘅好時機。

蔡慧敏愈減愈肥
蔡慧敏早前約滿無綫,她話得到相士指點迷津,決定去台灣發展,就快過台灣嘅蔡慧敏,希望以最佳狀態示人,不過就愈瘦身愈肥,蔡慧敏重話:「我都已經好努力節食減肥,但真係唔知點解出嚟嘅效果會咁反覆,我嘅體重不單止冇減,反而增加咗㖭,我都有啲奇怪。」
劉愷威想做軟飯王
劉愷威噚日出席喺將軍澳電視廣播城舉行嘅《十月星辰》生日會,其實愷威嘅正日生日係今個月十三號,佢話諗住買部大啲嘅車送畀自己,佢重話人大咗覺得一部家庭車會適合啲。緋聞女友廖碧兒近來工作不斷,豬籠入水,記者就笑愷威打跛腳都唔使憂,平日唔肯認拍拖嘅愷威,就笑住話自已嘅夢想係做軟飯王喎。

譚小環狂𢱑銀做老闆
譚小環最近要狂搵銀,因為佢要喺五年內完成自己嘅夢想,就係開cafe同埋買樓,所以最近佢又接咗部電影《賊時衝動》,噚日就喺北角開鏡拜神,佢話:「𠵱家我乜都會接嚟做,開一間cafe,應該要兩、三百萬,所以我想呢兩年搵多啲錢。」小環重話為咗儲錢,慳得就慳,好似佢個電話都唔敢買新款,𠵱家重係用緊無和弦聲嘅電話。

姚嘉妮做埋勞工處嗰份
姚嘉妮噚日喺將軍澳電視廣播城客串拍攝無綫劇集《皆大歡喜》,提起佢男友林祖輝,嘉妮話𠵱家男友做緊娛樂新聞監製,國內有二百幾個頻道都係用緊佢製作嘅娛樂新聞片,嘉妮重同記者打聽行情,睇吓有冇人可以介紹去見工,唔知佢係咪想祖輝快啲儲夠錢娶佢呢?
empty
你唔認得我陣徐咩?
楊千嬅
設計對白 資料圖片
empty
楊千嬅有三部片約在身,在《安娜與武林》一片中就飾演女警。
資料圖片
empty
蔡慧敏
empty
劉愷威
empty
譚小環
empty
姚嘉妮