韓國性感女星Clara，控訴遭事務所老闆短訊性騷擾而要求解約件事越搞越大，兩人對話嘅短訊內容日前更被公開。

事後Clara一方為咗力挽形象，解釋去年未能出席同門女團Ladies'Code成員高恩妃同權梨世嘅喪禮，係因為當時同公司關係唔好，仲反問：「從來冇同Ladies'Code見過面，喺唔識對方，而且又同公司唔啱嘅情況下，試問點出席呢？」不過謊言好快就被網民揭穿，齊齊圍剿佢。

原來Clara同梨世前年曾經共同演出過綜藝節目《明星跳水秀Splash》，但後來個節目因考慮到危險性等問題而cut咗，雖然只係拍咗好短時間，但二人曾一起演出擺明係事實。

網民直言對Clara好失望，話佢嘅解釋講唔通，「當然Clara有可能忘記曾經見過對方，但既然同屬一間公司，去弔唁都可以吧？」