【刻下愛的印記】太太想紋直線紀念婚姻 陳柏宇:我幫佢啦
紋身陳柏宇Dr Woo
陳柏宇連同國際著名嘅紋身師Dr Woo一齊喺銅鑼灣出席時裝品牌活動,擁有兩個大型紋身嘅柏宇表示一直都希望增添新紋身,不過就未諗紋啲乜。問到會唔會想整一個紋身紀念佢同太太符曉薇(Leanne)?佢話:「都有咁樣諗過,但一直都未諗到用咩方法去呈現,我偏好用圖案多過句子同名。」
咁太太又有無想法,陳柏宇話:「佢有呀,佢話想紋條直線喎,紋條直線咁簡單我幫佢紋都得啦,況且我都唔係好想佢紋,成三十幾歲人,仲紋嚟做咩呀。」但紋身好似無分年齡㗎喎?佢話:「都唔係關年齡事嘅,我知道Oscar(蕭潤邦)都啱啱紋咗,不過因為我有紋身,所以希望佢無,第時如果有小朋友嘅話會係一個好好嘅示範,俾佢睇到有紋身同無紋身都係一個選擇。」柏宇話唔反對自己仔女日後紋身,但最好係合法年齡後。
講起Oscar早前向女友江若琳求婚成功後,o依家正籌備婚禮,有冇向佢取經?柏宇話:「咁又無喎,佢哋兩個都係好有主意嘅人,亦都足夠成熟,相信佢哋會搞得掂。」
精選娛聞,喺晒《娛果》
http://fb.com/appledailyent
陳柏宇本身已經有兩個大型紋身,佢考慮緊下一個紋咩好。