63歲嘅港交所（388）行政總裁周文耀今個星期五lastday，噚日同中外傳媒舉行餞別午宴，候任行政總裁李小加代表港交所送上一個紀念網頁 http://www.bestwishespaulchow.hk，

上面有大量新舊照片同各界祝福，認真物輕情意重。
周文耀喺宴會上多謝傳媒多年支持，仲大爆港交所喺國金一期嘅寫字樓其實有條秘密通道，好多時一眾傳媒企晒係大堂等佢，苦候唔見，就係因為佢由秘密通道溜之大吉。
周總裁當然死都唔講秘密通道嘅出口喺邊啦，至於星期五佢會唔會靜靜雞透過呢條通道離開，亦要到時先知，但肯定嘅係，李小加以後都會選擇性搵路走。

唔外遊唔寫書

周文耀lastday之後，將要過三個月冷河，佢話冇打算外遊，亦一定唔會寫書──呢點真係令好多人失望，事關周總裁喺91至97年已經做聯交所行政總裁，再喺03年由滙豐投資管理重返港交所，做行政總裁至今，兩個任期加埋成12年，肯定知道好多內幕，唔出書真係嘥晒。周總裁笑笑口話：「星期五5點半放工後，就乜都唔記得。」
回顧喺交易所近廿年生涯，周文耀話「好多人對我好厚愛，要感恩，珍惜友誼」。佢又話當一個市場發展越嚟越大，越嚟越成功，參與者增加，一定充斥唔同意見。雖然市場喺季度報告同競價交易時段等問題有爭拗，但只要多啲溝通，終會達成共識。
除咗周文耀，證監會噚日亦宣佈營運總裁簡俊傑辭職，作個人發展，今年4月7日生效。估唔到虎年未到，又有高層變動。

李華華
mailto:[email protected]