吳君如首次自導自演電影《妖鈴鈴》，早前喺觀塘接受訪問，呢套戲仲搵咗好友吳鎮宇同方中信演出。君如笑言要自導自演難過做阿媽，原本佢做監製會爽好多，只係叫人做就得，o依家反被點，但因為整個故事係自己嘅，心中團火最強又最明白，監製最後由老公陳可辛來做，仲笑話自己冇做兩年嘢，搵老公做可以慳多筆錢。呢套喜劇加驚嚇元素，仲重金用二千幾萬喺番禺搭建爛樓場景：「我唔想拍完爛樓留喺地球，放個景喺度就好多人來拍或者用爛佢，拍完4個月自己炸咗佢，睇到都肉赤，但對電影嚟講呢個景係好有價值。」

而陳可辛更幫手搵來好多金像級嘅幕後班底工作，君如就話自己喺導演界入面只係小學生，今次化妝師搵來喺荷李活出名化喪屍妝、陳文輝個孫陳嘉偉主理，迫真到吳君如都曾經被嚇親，君如仲話：「吳鎮宇話俾你哋陳家三代搞我，由陳文輝到佢個孫。」

但為咗拍呢套戲，兩公婆因經常唔同意見而鬧交，君如爆真係會傷感情：「有日同幕後人員傾一場大戲，我同佢（陳可辛）有分歧，佢叫我入廁所，佢叫我一定要聽佢講，唔好咁硬頸，唔拍會終生後悔，我同佢鬧到面紅耳赤，鬧咗至少45分鐘，我拍完戲覺得小則會分房瞓，大則會分手。如果為部戲咁樣好無謂，但始終係演員，又要做導演，帶情緒返屋企無可避免。日前喺北京我仲話啲音樂唔得，佢都話整埋呢部（戲）好傷感情，同埋因為係家人講嘢唔避忌，我問佢有冇試過兜口兜面咁樣鬧女明星。加上我哋唔會成日喺屋企，最大問題就係第三者（女兒），屋企嗰件鬧情緒，我哋話除咗唔做嘢，就要分工照顧家庭，呢個係拍呢部戲得着，可能之後幾十年先再合作。」

平時方中信可以好chok，但呢套戲中會被醜化，帶頭套變地中海裝，君如話不如試對方底線，見佢冇反抗：「佢後尾枕生瘡，o依家應承佢以後包佢頭部按摩，拍拍吓用航拍抽起佢個織髮，希望好似拍《金雞SSS》王菀之出來嘅效果咁受（驚喜）。」君如仲話兩個朋友鬧今次係一個騙局：「吳鎮宇鬧我，佢平時簽約唔簽夜班，晚飯前收工，但呢套戲開40幾日夜班，仲要吊威吔又要撻落嚟，又打喪屍，話我黐線。」

化妝：Man Yun Ling
髮型：Yoyo Hui ＠Hip Hair Culture
服裝：Tod’s、Sergio Rossi