距離明年1月1日舉行嘅「2018年度叱咤樂壇流行榜頒獎典禮」尚有一個月。上周六起，商台開放「叱咤樂壇我最喜愛的男歌手」、「叱咤樂壇我最喜愛的女歌手」及「叱咤樂壇我最喜愛的組合」三個獎項，供樂迷以一人一票方式選出心頭好。

早在26號，投票一開鑼已經令大家好有驚喜，唔少人睇到個10強入圍名單，都叫到嘩嘩聲，事關其中一位入圍「歌手」，就係啱啱同謝安琪合唱新歌《（一個男人）一個女人和浴室》嘅古天樂喇！

即係咁，如果你仲係二十出頭，或者唔知道古仔其實喺18年前，其實曾經係香港樂壇新人，佢仲分別喺港台、新城同無綫攞過新人獎，佢首《男朋友》當年仲上過電台嘅流行榜冠軍o架，如果今次樂迷真係將古仔推到上台，咁就係古仔自2000年到現在，再喺香港樂壇嘅頒獎台上攞獎喇！

古仔早前得悉自己入選「叱咤樂壇我最喜愛的男歌手」時，曾經話「我諗唔會贏到陳奕迅啩！」的確，古仔最後贏唔贏到陳奕迅就仲係未知之數，但已經肯定嘅係已經撼贏謝霆鋒，成功打入5強。而另外四位打入5強嘅男歌手，分別係周國賢、陳柏宇、陳奕迅同張敬軒。

精選娛聞，喺晒《娛果》
http://fb.com/appledailyent