出咗名對法國名牌Hermès情有獨鍾嘅大劉劉鑾雄，最愛送贈Hermès手袋給身邊女伴及家眷，佢啲收藏品分分鐘勁過專門店，每逢有新貨推出，一定會喺佢啲身邊人出現，真係搞到城中唔少Hermès愛好者又愛又恨。

雖然今日有報道，話據知大劉身邊嘅女伴，將啲手袋喺公開場合拎過出嚟用之後，就要放入大劉儲物櫃，不過據《蘋果》收到嘅可靠消息透露，大劉送畀家人嘅Hermès有百幾個，而且買嘅多數係嗰啲特別版、限量版，個個Hermès價值不菲，隨時孭住「一層樓嘅首期」出街！

準劉太甘比梗係擁有最多手袋，收過700個Hermès，一向孝順嘅大劉，喺母親葉淑婉生前亦送咗300個Hermès，而呂麗君則收過200個Hermès，邊個最得寵似乎唔駛多講喇！

大劉今日接受《蘋果》訪問，對於有報道指大劉收番送俾呂麗君嘅Hermès手袋，大劉就話：「我收番任何一個包包就絕子絕孫，我買Hermès用咗幾億，送畀呂麗君嘅Hermès超過200個。」