當年今日

被指違反協議私自開會
馮仁昭四圍超:華仔又遭麥紹棠控告

蘋果日報 2002/07/27 00:00


麥紹棠同劉德華嘅官司一單未了,又有另外一單,麥紹棠嘅中建公司噚日透過總法律顧問董樹倫,入稟法院控告劉德華同佢旗下一間公司、ChanCheeSum、WinsonChan同一間佢哋委派嘅律師行,指佢哋違反股東協議私自開會。因為根據條件,天幕同中建要派股東代表開會,但佢哋日前就冇遵守協議而私自開會。對於劉德華接拍新片《無間行者》,董樹倫噚日喺上海表示:「我唔知佢點解咁做,我哋都有接觸過華仔,可能佢覺得咁做冇錯。但公司立場就要了解再作評論,強調大原則一定要維護合約精神。」

撐Sammi做女友
劉德華噚日則出席博愛醫院屯門護養院慈善紀念封義賣大行動,同現場嘅小朋友玩遊戲,而老人家就送咗一盆用珠仔串成嘅桔畀華仔,有老人家話祝華仔身體健康。
華仔對於有報道講話鄭秀文(Sammi)為咗同楊千嬅爭做《無間行者》女主角而自願減片酬,華仔話:「我從來冇聽過呢件事,我覺得Sammi做我嘅女朋友最適合。」

許愿同珍妹密密斟
香港作曲家及作詞家者協會前日喺鷹君酒店舉行二十五周年慶祝酒會,身為理事嘅許愿話同前妻李麗珍之間嘅誤會已經解決晒,而佢哋兩個近來亦都要為咗囡囡參加暑期活動嘅事而成日通電話。許愿重話同珍妹有傾有講,氣氛都好和平,因為之前嘅事只係過眼雲煙。
黃耀明指哥哥好轉
黃耀明噚日喺新城電台接受節目「家天下」訪問,對於同哥哥張國榮合作,佢覺得好高興,而日前重同哥哥通過電話,佢話哥哥個病已經好番好多,哥哥主要係胃酸多同喉痛聲沙,而哥哥重同佢講對唔住,要他一人獨力做唱片宣傳嘅工作。

佘詩曼養水藻求愛
佘詩曼(阿佘)噚日到黃埔新城娛樂台,接受節目《一個靚墟》嘅直播訪問。阿佘重帶同佢心愛嘅水藻植物到來。阿佘話水藻植物係喺日本阿塞湖買,佢話:「我聽講傳說話有個公主好喜歡一名士兵,但俾家人反對,結果佢哋跳入湖中長出水藻,真係好令人感動。平時我都冇時間飼養動物,但種水藻一個星期換一次水,我重可以向水藻祈福。」問到阿佘祈福的結果,佢話:「都實現咗兩個,係之前我好想放假同一個關於家人嘅願望。」阿佘可渴望祈求愛情?佢又話:「我都希望佢會帶嚟愛情。」

林嘉欣冇獎都開心
林嘉欣憑靈異電影《異度空間》角逐韓國富川國際電影節最佳女主角同最佳電影,雖然最後落敗,但佢就話:「唔失望!因為所有得獎嘅電影都係大熱門,我早就有心理準備,我都係以觀摩心情去參加。」雖然輸咗,但嘉欣依然好開心咁話:「有個荷李活導演阿Jeff讚我靚,重叫我寄啲DVD畀佢。」
朱茵愛情宜遠觀
商台噚日《茶煲裏的查篤撐》訪問朱茵,分享佢嘅感情世界,原來佢自認係愛恨分明,對揀值得相信嘅男朋友係有佢自己嘅標準,佢話:「其實揀男朋友係要冷靜啲,唔可以衝動,因為一衝動就係迷戀,我以前細個都試過。而一段感情係唔可以咁容易就開始,反而係需要遠觀。」

蘇有朋演無忌成口泥
在新劇《倚天屠龍記》中飾演張無忌嘅蘇有朋,喺劇裏面有唔少打鬥鏡頭,但係佢為咗令套劇更加有真實感,佢冇用替身,全部都親身上陣。蘇有朋喺戲入面又要飛天踢腿、刀來劍往,對於完全冇武功底子嘅蘇有朋嚟講真係吃盡苦頭。佢成身撞到瘀晒外,重試過跌落地,搞到成口都係泥。

李思蓓別墅撞鬼
李思蓓近日除咗忙緊為無綫拍劇集外,亦接拍咗由羅舜泉導演嘅鬼片《寬頻聊齋系列》,李思蓓喺戲中擔任女主角,日前佢更去咗深圳一間豪華別墅拍攝,喺拍攝期間,由導演親身扮演嘅「甩鼻鬼」經常突然出現,每次都嚇到李思蓓拔足狂奔,喺屋裏面大跑大叫。