當年今日
關於我們

701收料站:德林崇高炒業績

蘋果日報 2003/02/20 00:00


小型工業股炒風一隻接一隻,小初淨係睇公司資料都睇到眼花。經紀黃話可翻炒玩具股,特別係生產毛絨公仔嘅公司。
經紀黃推介嘅毛絨公仔股有2隻,一大一細,大者係德林國際(1126),細者係崇高國際(209)。兩隻股不約而同在舊年二、三月期間上市,股價同樣係一度炒高,但收尾又靜番晒,打回原形咁滯。
兩間公司將在一兩個月內,公布全年業績。有人計過條數,表現會唔錯,可以趁工業股熱潮乘機炒一轉。
崇高噚日已經率先開車,大升11.53%,收0.58元。隻股舊年上半年,中期盈利上升15.7%至1971萬元,兼夾有息派,斷估全年唔會太走樣。
至於德林在星洲芬佬支持下,股價拾級而上,噚日亦升4.13%,收1.51元。舊年中期盈利有4981萬元,比前年同期增長10.1%。
小初嘅睇法,崇高好明顯係短炒格局,德林Size夠大,適合芬佬口味,可以長揸。
慕容小初