今年2月底舉行嘅立法會新界東補選，當時嘅7號仔係公民黨楊岳橋Alvin，最終成功當選。嚟緊9月再戰，前日候選人抽籤決定參選號碼，AY竟然抽返7號，認真與「7」有緣。

八方問過AY，佢當然唔覺然「7」有問題，仲話讀起嚟特別好記，加上選民半年前先聽過「請投7號楊岳橋」，應該仲有印象，宣傳時亦有少少好處，抽得返都幾好彩喎！

咁補選時嘅物資係咪用得返？佢話文宣、口號等都唔同晒，唯一用得返嘅係「7號」貼紙，好過冇啦！問到上次補選嘅6號仔、即係本土民主前線梁天琦冇得選，對佢選情有冇影響？AY話唔去評估嘞，只強調邊個泛民返到立法會都好，都要追究到底！