滙控（005）新人事新作風，繼之前講咗今日個業績會改為視像會議之後，據英國《星期日電訊報》引述消息話，舵手歐智華打算喺嚟緊嘅5月，首度搞個極大型嘅投資者見面會，同大家傾吓業務發展策略，今年打算喺倫敦搞，下年就可能會改喺其他地方，以凸顯滙控嘅國際形象。
報道話，呢個見面會可能成為常規性一年一度嘅盛事，主要係會見滙控嘅大型股東同分析員，有別於以往，滙控會喺一年兩次嘅業績會報告之後，同投資者一對一見面嘅做法。華華聽消息講，歐智華咁做，係希望更清晰表達滙控嘅發展策略，要巨細無遺咁同大家分享喎。

幾多花紅今日有分曉

數番上次有咁大型嘅投資者日，已經係07年11月嘅事，當時搞得好倉卒，主要係為咗安撫當時意見多多嘅基金股東KnightVinke。報道話，滙控呢項革新，已通知晒啲主要股東。成件事變得更透明係好事，不過華華好奇，每年單獨見開管理層嘅大型基金股東，變咗要同其他人一齊同枱食飯，會唔會唔制o架？
另一熱門話題，就係歐智華舊年到底幾多花紅？之前爆前舵手紀勤大鑊、搞到滙控話要查董事局內奸嘅《金融時報》姊妹報《星期日泰晤士報》引述消息話，歐智華嘅分紅可能由09年嘅900萬英鎊減到得700萬英鎊，咦，前排仲講緊1000萬鎊o架！結果係點？今日有分曉！

李華華
mailto:[email protected]