有線電視繼上月娛樂新聞組大裁員，全組炒咗12人只剩一人後，《蘋果》今日收到可靠消息，有線今日再有大規模裁員行動，據悉今日 on air promotion (形象宣傳)有10多名資深員工被裁，另外，體育組、工程部同行政部亦有合共逾20名員被裁，換言之今日有逾30員工受影響，而盛傳今年年尾會有下一部裁員行動。

有線寬頻旗下的奇妙電視，節目內容由有線電視提供，據《蘋果》了解，開台僅一年多的奇妙電視正計劃改名及改台徽，由於節目內容上大規模搵外判商提供，所以內部員工人手架構重新安排調整下要裁減大量員工。據知除咗馬浚偉、陳志雲幫奇妙電視做外判節目之外，葛民輝亦會幫奇妙主持一個新節目《兒嬉立法會》。

除此之外，有線已經冇用承辦商續約做canteen，員工canteen要改建為貨倉，僅安排幾部食物售賣機售賣食物畀返通宵更員工，唔少員工都呻有線冇啖好食。

《蘋果》就今日裁員向有線公關求證，有關方面承認裁員行動，但冇透露裁減幾多員工:「為配合業務發展，並適當調節現有資源，公司進行架構重整而精簡人手。」

有線主席邱達昌本月3日出席活動時，曾被問會唔會再有裁員計劃，邱達昌當時話:「呢個唔好答你住先。」想不到事隔幾日已再有行動。