上星期日聽陶傑、劉天賜、文潔華、黃牧師等在港台《講東講西》談「氣節」，聽到嘻哈大笑。氣節係典型中國概念，譯為英文甚艱難，一位中六學生意圖挑戰，抄下商務漢英字典嘅譯文，把「氣節」譯作moralintegrity，傳真畀陶傑睇，陶傑指譯文十分不通，乃典型中式英文，字典英譯者唔識英語，因為英文概念只有integrity概念，從來都冇甚麼moralintegrity也。

中國文字譯為英文相當唔易，因為我哋嘅思想文化、概念咁歷史悠長，一旦譯為英語，就變成兩不像。讀書不通之人硬要翻譯中文為英文，啲英文更加肉麻，鬼子佬冇法子睇得明白。
好似星期一《信報》頭版廣告（浮面廣告價起碼十萬零八百元）「反戰宣言」，係「一群地球人」嘅反戰聲明，廣告嘅中文已經似通非通，甚為歐化，好似係英文翻譯過嚟嘅，但廣告附有英文，睇真啲，英文句子混亂，語法都錯，唔通係自中文原文翻譯過嚟嘅？例如Wedon'tknowhowtheUSGovernmentcanassureofnoinnocentcasualties,orwillwarreallyhelptheireconomies（我們不知美國政府如何保證戰爭不會帶來無辜傷亡；或許戰事真的對他們的經濟有利。）
香港好多成年人成日批評學生英文唔好，其實成年人啲英語亦唔多掂，彼此彼此啫。左丁山自問淺陋，平時唔敢彈人家啲英文，不過agroupofpeopleonearth既然有咁多錢去賣廣告反戰，點解唔畀錢請專家執一執啲文字呢？