喺台灣舉行完粉絲見面會嘅金秀賢,喺見面會唱《你家面前》時話:「我有很多不足的地方,但大家依舊支持我,謝謝大家。」之後更感觸落淚。
話咁快,傍晚時份金秀賢已經由台灣桃園機場出發離開,乘坐東方航空MU5006班機去上海喇。不過就因為航班遲足一個鐘,所以「都叫獸(教授普通話諧音)」就要再遲成個鐘先抵達上海浦東。
內地粉絲就一早做好準備,喺金秀賢吧呼籲大家6點半去到機場「迎接聖駕」,依家嘅金秀賢真係巴閉過皇帝,大概6點鐘機場已經有6、7百粉絲喺上海機場嘅一號客運大樓守候喇。記者現場所見主要都係十幾歲嘅女仔,仲準備晒準備黃色小banner同旗仔歡迎金秀賢嚟到內地粉絲見面會嘅首站。又有人戴住臂章,呼籲大家守秩序,要等得有文化同唔好推撞。
由於機場接機大堂唔係幾大,所以部份人就轉戰上一層,打算隔住玻璃圍欄可以遠觀偶像,另外又可以遠眺行李輸送帶位置,不過就因為聚集得太多人喇,所以就被公安驅趕,免生危險。