韓國靚媽李敏貞上月寓工作於娛樂，飛咗去夏威夷為雜誌影新相，然後就一直未有現身見粉絲，只係更新Instagram畀粉絲知道吓佢嘅近況。不過靚媽似乎聽到粉絲嘅心聲，今日終於蒲頭，現身百貨公司出席品牌簽名會。

靚媽李敏貞今日就包實，鬆身外套配牛仔褲，再加上雨靴，認真冇乜睇頭，不過成個Look就幾青春吓，望落真係唔似已經34歲。但今日韓國嘅天氣似乎唔多好，李敏貞現身時落緊雨，要由保安人員擔遮送佢到台上，不過台上冇得遮，李敏貞只好自己擔遮，企定定畀媒體影相。好彩雨勢唔大，隔咗一陣仲停埋雨，靚媽可以放心坐低為粉絲簽名。