雖然今晚（22日）快活谷馬場有八場草地賽進行，但今早都見唔少外籍同本地騎師到場操馬，睇嚟各人都想向練馬師們展示其努力，望獲得更多座騎，從而獲更多贏馬機會。

潘頓正是上述所講其中一位，佢到場只操三匹賽駒就離開馬場，分別為容天鵬馬房一對「一本萬利」、「觀自在」，仲有就係文家良馬房「紅海灣」。尤其佢操完「紅海灣」，專程走去烽火台搵文家良匯報操練情況，動態相當特別。

「紅海灣」今季曾經喺三班1600米，在祈普敦胯下從後追趕，僅以一乘半搏得一席季軍。雖然其後三戰走勢唔算太好，但周日（26日）首次落四班，爭逐曾贏馬之1600米，更強配潘頓，加上今日的特別動態，相信呢匹馬會有機會嚟個大變身。