大市整固，資金繼續打游擊，沉寂一輪嘅環保股又發威。雖然內房股稍稍回吐，但噚日推介嘅合富輝煌（733），逆市照升2%，尚算理想。早前宣佈分拆商業物業上市嘅眾安房產（672），大大棍爆升28%，兼有成交配合，話唔定有動作跟尾，可多加留意。

今年中西情人節撞到正一正，大小商家都吼準呢個搵銀機會，翠華（1314）更推出108蚊情人節套餐，綽頭十足。禮物亦係不可缺少嘅一環，除咗靚靚玫瑰外，相信最得女性歡心嘅，非毛公仔莫屬。要數頭五名最受歡迎毛公仔，日本鬆弛熊肯定有份，連歌星楊千嬅都係佢粉絲，吸引力之大可想而知，負責生產鬆弛熊嘅德林（1126），概念十足！
德林主要業務包括設計、發展、製造及銷售毛絨玩具、騎乘玩具及塑膠手板模型，除咗鬆弛熊外，亦有生產韓國卡通Pucca和Canimals玩具，食正日韓潮流。
截至去年6月底止，德林中期賺5,024.5萬銀，按年增長16%，勢頭良好，保守估計下半年盈利按年不變，市盈率不足7倍，股息率接近9厘，每股淨現金0.53元，相當於市值逾四成，三個字︰平靚正。噚日圖表亦見異動，正挑戰去年底高位，一旦破位，目標直指1.7元，潛在升幅32%，絕對係送畀戰友嘅最佳情人節禮物。

唐牛