現年26歲嘅韓國「馬舞女」泫雅上月認戀同門師弟團PENTAGON嘅24歲成員E'Dawn，此舉似乎激嬲所屬嘅CUBE事務所，E'Dawn現時無法現身活動，疑似被公司雪藏。而E'Dawn今早於官方粉絲論壇發文，首度剖白公開戀情後嘅心境，並向粉絲道歉。

E'Dawn寫道：「咁遲先首次親自寫下呢啲文字，我真係好抱歉，我好想喺原定8月進行嘅活動上同粉絲見面，想直接喺大家面前親口講出呢番說話，想理直氣壯咁企喺舞台上，向大家表達我嘅真心，但無論我點諗都好，我最終無法出席。」續指：「依家，想對因我突然消失而感到驚慌嘅粉絲，講一聲抱歉。我知呢句抱歉嚟得太遲，亦唔知呢段文字能唔能夠表達我嘅歉意，但我仍然想為難過、等待我嘅粉絲，知道我嘅消息及想法，所以決定喺呢度發文。」

E'Dawn表示公開戀情前，曾經多次同PENTAGON成員討論，公開戀情到底係啱定錯，E'Dawn又指喺決定公開之前都感到害怕、畏懼，但呢個係佢自己嘅選擇，比起日後要作更多大話去隱瞞，咁不如坦率地公開。E'Dawn稱：「經歷呢一個月嘅漫長時光，一開始我都預想到大家會有厭惡嘅情緒，又會擔心會唔會傷到大家嘅心，呢段時間我思考咗好多，我都覺得好傷心。雖然唔知我幾時可以再見大家，但希望大家呢段時間都要保重身體，我都會過得好好，再向大家講聲對唔住。多謝。」

更多韓流，喺晒《娛果》
http://fb.com/appledailyent