巴塞隆拿上禮拜六喺西甲國家打吡作客巴拿比奴贏皇家馬德里3:0，前鋒美斯喺呢場大戰入一粒，兼有一次助攻，係巴塞表現最好嘅其中一位球員。不過，最誇張嘅係，美斯嘅表現雖然係舉足輕重，但原來呢位阿根廷國家隊隊長成場波幾乎無跑過咁滯，一直都係行行企企。

西班牙《馬卡報》報道，根據統計數字，喺國家打吡踢足90分鐘嘅美斯，超過八成嘅時間係喺度行緊，足足有83.1%嘅時間。其餘時間，美斯嘅速度有10.8%係慢跑緊，真正跑緊嘅時間係4.95%，另外果1.15%嘅就係全速跑緊，即係大約有一分鐘左右。不過講番轉頭，美斯係巴塞今季唯一踢足所有西甲賽事嘅外場球員，咁梗係要識得留力喇，唔通下下死衝咩？

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM