上回講到十幾年前，入U申請公屋，畢業就有得上樓。有時同舊時班書友仔呻吓樓價貴租又貴，總會問一句：點解果陣唔識申請公屋咁笨？而到咗今時今日，18歲一夠秤就申請公屋呢條路，原來都有得諗架喎！話說早前聽聞，有個相當高級嘅政府員工，竟然叫個仔一夠18歲就申請公屋！初初聽到眼都凸，咩料呀搵十幾皮一個月都叫個仔申請公屋，但返到屋企計計數，又不得不佩服呢位人兄嘅遠見。

截至3月底，有15.3萬宗公屋申請，非長者一人申請有多達11.9萬宗，2人或以上家庭嘅一般申請，平均輪候時間係5.1年。聽到5.1年又想鬧政府？算罷喇鬧到口臭都無咩用，我哋不如轉用神探伽利略嘅頭腦計計數。

非長者一人申請玩計分制，18歲申請係一個崩都無嘅，每遲1歲申請就多9分，到你45歲果陣，就會皇恩浩蕩奬你60分，然後每輪候一個月又會多1分。咁究竟幾多分先上到樓呢?根據房委會網頁最新數字，各區上樓分數係由426至438分不等。登登登櫈！經過我精密計算，如果一夠18歲就申請，假設上樓參考分數維持不變，恭喜你，你49歲生日前就可以上樓喇！

機會係留畀有準備嘅人，講真到你48歲都無發達，除非係中六合彩，或者有個你都唔識嘅遠房親戚留返幾千萬遺產畀你，否則都神仙難救架喇！記住！呢個時候你應該轉份低收入工作，或者索性辭工，再洗晒果雞碎咁多嘅積蓄，然後你就會收到資格審查嘅通知，再過多幾個月，你就上樓喇！搞完裝修呀安頓一年半載夠50歲，咪去試吓搵份好工囉，上樓頭十年唔洗審查架嘛，到要審查果陣，你都60歲咯，放心佢唔會趕嚟走架喇！人生係咪充滿希望先？呢條密底算盤數，唔得高人提點都唔識計，所以人哋咪一個月搵十幾皮，我就做廢中囉。

專欄作者簡介：
吳宛盈Carol
做咗10+年電視地產記者，又窮又奄尖喺香港上車無期，幾廿歳學人尋自由玩劈炮，乜都試又睇吓會唔會餓死？

Facebook專頁：
https://www.facebook.com/carolngyy

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland