因為無綫807個專業評審團，靚靚贏咗老公張智霖(Chilam)一隻鑲滿鑽石、要成50萬元嘅Hermès18K玫瑰金鑽石手鈪，真係鬼死咁令人羨慕，佢仲喺微博公開多謝TVB、多謝梁家樹、曾勵珍同樂易玲、余詠珊等，同埋擁有上帝之手個807位專業評委，話如果冇佢哋神聖一票(投俾黃子華令佢封視帝)、靚靚都唔會收到願賭服輸嘅Chilam呢隻鈪喎！

靚靚呢番言論，拍得住Chilam嗰段「義氣仔女」論，一樣型爆，絕不酸溜溜。之後有好多網民同粉絲，就梗係安慰阿靚同埋失落視帝嘅Chilam，仲話Chilam根本一早買定隻金鑽石手鈪，無論贏輸，都實送畀老婆喇！

話雖如此，伶身俐齒嘅靚靚，似是擺明高興收禮，暗串無綫假民主。但係有網民就唔多認同靚靚做法，留言話Chilam好明顯係輸唔起，又話佢兩公婆一樣咁衰、叫Chilam返去唱歌，仲有一個激動網民狂罵靚靚，叫佢唔好喺度被害妄想症發作、影衰晒個老公云云。

忍無可忍嘅靚靚終於還擊，反問網民:「你有病嗎？你是來找事嗎？」、「你能發表，為什麼公眾人物不能？你看不明白，就不要來這裡！」、「你沒看清楚我意思，不怪你，88!」

不過靚靚回得多，都覺得有啲悶啩，所以及後有網民話:「子華應得的。輸了獎，還要輸了胸襟。」靚靚就話:「謝謝你的到來！」亦有網民力撐靚靚兩公婆，謂:「真心覺得有些網友的評論太上崗上線了，其實這個就是他們夫妻的一個賭約，個別人非得聯繫到什麼『顯擺』、『氣其他人』……真心沒必要！喜歡靚靚的人應該都知道：這傢伙是直腸子，沒那麼多彎彎繞！」

晚上仍有不少網民於靚靚個微博留言，有人話：「好老實講，你老公系《衝上雲霄2》只系第一男配角咋，最受歡迎男角色咪幾好，畢竟《衝上雲霄》系列男主角從來只有吳鎮宇一個。」靚靚就回應謂：「我亦認為是這樣，他是靈魂人物！」

今日Chilam喺微博擺咗兩張藍天出遊相，寫道:「It'sabeautifulday!whatawonderfulworld」仲加個kisskiss公仔。係囉，拗嚟冇用，學Chilam話齋，靚靚已經係大贏家喇。咁嘅遊戲，認真嚟做乜？