大曾曾慶紅噚日下晝四點左右，經落馬洲抵港展開佢三日親民騷。大曾果然識做，一到埗就冧盡班行家，企定定講番幾句，重入鄉隨俗，學人講廣東話多謝大家。煲呔亦不怠慢，親自帶住福祿壽三星，肥龍、唐唐同埋詩姐姐，去到邊境接貴人。
煲呔成功上位，取老董而代之，曾慶紅副主席發揮好大作用，稱得上係煲呔大恩人。八方最近聽咗個古仔，都十分有趣，話說當日老董喺老江嘅力撐下，成功高票連任，當時中央已經開始發現，老董愈嚟愈唔聽點，成隻蠻牛咁，我行我素，當阿爺冇到，最後搞到五十萬人上街，以胡溫為首嘅新領導，覺得忍無可忍，決定換人。
不過，換還換，都要畀啲面老董嘅大靠山江澤民，於是身為黨港澳小組組長嘅大曾，就安排煲呔上京，時間大約喺今年二月，地點係北京，曾蔭權由江澤民口中獲得祝福，馬上成個生晒，信心萬倍，喺農曆新年講過話準備告老歸田嘅豪情壯語，即時全部拋諸腦後。

個個星期北上打關係

大曾之厲害盡見於此，結果老董投訴無門，一時唔知搵邊個出頭，老江都唔挺你，就可以收檔啦。咁人蠢冇藥醫，老董連擦鞋都唔識，人哋江主席○四年南下去深圳度歲，住成一頭半個月，你都唔敢上去問安，而煲呔就趁住搞9+2合作，個個星期同助手朱曼玲，由深圳過境上珠三角，逐個省市拜訪，放假亦返祖國打關係，有理冇理認曾子係祖先，咁就識撈啦。


爆料熱線：29290000、27860099
報料傳真：26239278
報料電郵：[email protected]