補選投票星期日就到，坊間嘅選舉氣氛唔多強烈，各路候選人相信要喺呢段時間加緊宣傳最後衝刺，其中連日有明星級民主派撐場助選嘅港島區候選人區諾軒，今朝就獲前政司司長陳方安生陪同喺海富天橋政總一帶拉公務員票，期間教育局政治助理、新民黨執委施俊輝路過天橋準備返工，但佢冇接到區諾軒派發嘅單張，只係回頭同對方簡單傾談幾句就離開。

區諾軒話呀，施俊輝早前曾就補選問題查詢佢嘅動向，所以就同對方講：「今日我畀咗答案你啦！」。區諾軒嘅對手之一包括新民黨陳家珮，唔通施俊輝係想幫黨友收風？

而噚日獲邀出席區諾軒造勢大會嘅公民黨前立法會議員陳家洛，大爆區諾軒威水史，透露佢呢位中大師弟，曾經係香港政治科學學會嘅最佳論文獎得主，呼籲巿民投票支持呢位好讀得書嘅年輕人，為香港人爭返啖氣。區諾軒話嗰篇文主要寫2003年東區同深水埗區嘅建制派動員情況，再講出威權主義嘅政權有何變化，當年佢嘅指導老師就係中大教授馬嶽。

【倒數6日】立會補選新聞，《蘋果》一網睇晒
https://hk.feature.appledaily.com/legco2018/