利物浦反勝曼城奪冠！唔使咁緊張，講緊嘅其實係周四晚嘅青年英格蘭足總盃決賽，利物浦憑互射12碼贏咗曼城，12年嚟首次捧走呢項賽事嘅冠軍。今場比賽利記U18一直落後一球畀曼城U18，不過紅軍前鋒波比鄧肯、亦即係前利物浦隊長謝拉特個表弟，喺最後關頭遠射建功幫球隊追平，將比賽帶入加時。兩隊之後都冇再入波，最終利記喺互射12碼階段贏5:3，捧走英格蘭青年足總盃。

青年隊嘅較量就由利記贏出，不過一隊喺英超嘅爭標路依然鬥得難分難解，今輪前藍月就領先緊紅軍一分，如果最後三場贏晒就可以捧走英超獎盃。有位住喺般尼、網名叫Vizeh嘅YouTuber就喺twitter呼籲紅軍球迷將頭像換做般尼前鋒艾殊利班尼斯個樣，希望下周日迎戰曼城嘅般尼可以搞到對方失分，結果一夜之間就有5,000人響應咗佢嘅要求，都咪話唔犀利。