面色蒼白的阿慈日前向到訪記者訴說:「我以前喺屋企跌過兩次,跌得好傷,條腰骨有一節裂咗,有一節移位,之後開始靠電動輪椅代步,𠵱家我啲筋骨開始退化,頸骨唔夠力支撐個頭,條腰骨彎到S形咁,手腳冇乜力,……但部輪椅壞咗,已經唔行得。」痙攣令阿慈手指關節屈曲、手腳難以靈活伸縮,行動不便,另亦口齒不清,須費力地一字一句道出苦況。
阿慈早年修畢特殊學校的中一課程後,多年來一直在庇護工場從事包裝及簡單文書工作。數年前,阿慈不幸在家中跌傷,加上隨着年紀增長,四肢及腰骨活動能力每下愈況,遂被迫停止在庇護工場的工作。
現有輪椅已失靈
與阿慈結婚六載,對她愛護有加的王先生向記者指出,阿慈現有的電動輪椅是由一間慈善機構於四年前轉贈,助她解決出入及起居生活困難,奈何電動輪椅因日久失修,現已操作失靈。
他歎道:「前排成日落大雨,部輪椅唔濕得水,試過中途喺街度行唔郁,冇幾耐兩個後轆開始壞壞哋。𠵱家阿慈冇輪椅用,我又唔夠力扶佢出入,真係好煩惱!」王先生與阿慈同齡,他在兒時因發高燒引致患小兒麻痹症,自此手腳活動欠佳,近年常感雙腿痠痛,苦不堪言。