【新增動新聞】

車路士前鋒迪亞高哥斯達（DC）嘅轉會風波一直都未有平息，而佢今個夏天都一直好想返去西甲嘅馬德里體育會，但最終都係走唔到。據英國《太陽報》報道，避走巴西嘅DC經已回心轉意，佢現時更準備同車路士談判，似乎有意再為藍軍上陣搏表現，從而再次獲西班牙國家隊徵召，以出戰俄羅斯世界盃。DC雖然有被列入英超名單，但最終都未有被列入藍軍嘅歐聯25人大軍名單，唔知會唔會令談判出現變數？

DC自從同領隊干地鬧翻後，就一直神隱，返咗真正家鄉巴西，一直唔肯參加藍軍嘅季前集訓。雖然事件仲係未解決，但隊友就好歡迎佢「愛回家」。其中夏薩特就話，佢好歡迎DC歸隊：「DC係一個優秀嘅球員，我希望佢早前搵到問題嘅解決辦法，同埋我想見到佢重返球場。」

藍戰士公布嘅歐聯名單頗為「正路」，兩名正前鋒艾華路莫拉達以及巴舒亞伊齊齊入選，甚至之前被指「辱華」嘅羅拔堅尼地都有入選，只係淨低DC一個被遺忘。