85歲嘅「股壇教父」李福兆長居泰國接近20年，良久未有公開露面，舊年初忽然回港出席證券商協會33周年晚宴跟朋友敍舊，就係呢次露面，外界先至知道李福兆患上胃癌，之後佢又返回泰國，間唔中先回港。不過據了解，佢幾個月前已經返港，留港休養。
李福兆喺財經界德高望重，好多人尊稱佢為「校長」，只係佢長居泰國20年，年輕一輩未必對佢好了解，但係一提到1987年股災，大家一定記得起佢。
李福兆係聯交所前主席，香港發生87年股災，就係佢宣佈停市4日，股市重開跌到七個一皮，佢俾人鬧到飛起。
1988年佢被廉署拘捕，指佢非法收受新上市公司配售股份，前後入獄32個月，1993年提早出獄，翌年就離港長居泰國。

曾患胃癌做手術

佢離港多年，舊年年初專程回港出席證券商協會33周年晚宴，忽然公開露面，特別哄動，大家亦發現佢消瘦咗好多，原來佢前年7月因胃痛入院檢查，發現患上胃癌，之後在港進行手術，切除咗三分之二個胃，並且要進行化療。
聽聞，李校長過去呢幾個月主要留喺香港休養，不時進出港島區某間醫院。不過，見慣風浪嘅校長對於患病處之泰然，佢舊年接受本報訪問時曾經話過：「呢個係人生過程，如果要死都係死，無可避免，唔需要認真。」希望李校長休養一段時間之後，再為港股把脈喇。

李華華
mailto:[email protected]