【做茄喱啡OK】跟外母邵音音入影圈? 波多野裕介等導演上門
連詩雅邵音音曾若華波多野裕介
日籍電影配樂師、邵音音女婿波多野裕介今日去到新城電台接受訪問,太太許湘韻都有陪同出席。平時玩開古典樂同爵士樂嘅裕介,喺最近配樂嘅電影《今晚打喪屍》入面就用咗好多搖滾嘅元素,係佢嘅新嘗試,自己做完都覺得驚嚇到被嚇親。
原來裕介個人都好有趣,半鹹半淡嘅廣東話加上可愛嘅表情,好有喜劇細胞,問到佢會唔會試吓幕前工作,拍吓搞笑電影?裕介笑話:「做茄喱啡OK,練好啲廣東話先,做的士司機都可以,有導演搵我會做。」裕介仲話有兩個日籍好友葉山豪同倉田保昭,佢哋兩個都可以講流利廣東話,佢話:「希望我60歲嘅時候好似倉田保昭咁有型,廣東話有葉山豪咁好。」
此外,歌手曾若華(Jude)今日都喺新城接受訪問,佢直言上年因為唔夠上進被公司雪藏,今年佢終於向公司認錯,最近「解凍復出」嘅佢就話好開心,仲話唔敢失場同遲到,同埋即將會有好多創作面世。問到師姐連詩雅同華納唱片的合約糾紛,Jude就話:「我冇見過佢(Shiga),知道公司係有啲嘢,但唔清楚詳情,我哋私底下冇聯絡。」
早前佢先同外母邵音音一齊出席林敏驄作品展(資料圖片)
今日波多野裕介帶埋老婆去新城,接受DJ林子謙訪問。