賭王四房大女何超盈今日向《蘋果》親認，與哈佛男友Thomas Xin去年9月已訂婚，並已陀豬B三個月，由於今年是盲年，四太梁安琪就建議二人出年才結婚，而超盈已計劃明年去葡萄牙搞古堡主題婚禮。（新聞連結： https://bit.ly/2IXl0Hv ）

作為準婆婆的梁安琪今晚約十點，現身養和醫院探望賭王，一見傳媒就停下做訪問，四太透露去了澳門出席三八婦女節活動趕回來，問到抱孫心情，她多次講：「十分之開心。」問到她將做後生婆婆，她就笑言：「我唔後生，真係好開心，我都興奮咗好耐，開心嘅嘢大家一齊分享。」問到她想要男孫定女孫，四太表示：「超盈話畀我知會畀一個surprise我，初頭我唔知佢講咩，喺我生日畀surprise，定到時講男定女，定講有咗BB。」四太表示女兒還未向她提及預產期，更笑言這個消息開心到令她有少少失眠：「呢個係開心，唔識講點開心，何生已經知到呢個喜訊，好多朋友都知，希望唔好騷擾佢哋，畀佢多啲休息。」

問到超盈先訂婚，會先生BB才結婚的安排，四太表示：「其實佢好想搞婚禮，但我覺得今年好似係盲年，叫佢不如訂咗婚先，點知佢哋已有計劃，佢求婚嘅時候，我都一早知。」對於準女婿Thomas的評分，四太就以「十分之好」來形容：「最緊要佢哋開心，我哋見過雙方家長，佢都見過賭王，不過佢哋想低調啲，至於佢係做啲咩，你就問番超盈，佢今日咁樣，我已十分之開心。」問到她想超盈生幾個小朋友，四太表示：「有叫佢多啲，叫佢繼續努力，多啲好，一個小朋友悶啲，起碼生多一、兩個。」提到會否幫手湊孫，四太就笑言：「我已同佢講我湊，佢話諗吓先，我都十分之開心，我咁嘅年紀都唔後生，我都比較緊張，都要霸住，你知我幾忙，會重新安排工作時間。」

四太表示家中湊大超盈的老工人也十分緊張，已日日有額外湯水給超盈進補，記者問到她有「幸福肥」，她表示：「佢一拍拖已開心，係美滿。」提到她於23日的生日，會否充滿驚喜，四太表示都是與朋友食飯，最後問到百日宴會否與婚禮一齊搞，四太表示：「超盈自己諗，我哋葡萄牙間屋都幾好，佢都有自己朋友，有自己想法。」問到超盈有否減少工作安胎，她表示女兒已沒有返工，在家遙控團隊安排工作。

此外，Moiselle太子爺陳柏熹與超盈識於微時，他接受《蘋果》訪問時表示：「早過你哋知，我係BB大契爺，會錫到佢燶，買禮物未知，咁早，超盈由細到大經歷咗好多，又一齊經歷咗人生開心同唔開心，靠住好好友誼一齊行，都身經百戰好辛苦。」問到好友結婚，會否為對方設計婚紗，他表示：「我諗佢結婚啲衫同婚紗都唔敢搵其他人做，係要搵我做，呢個唔使問，亦唔會托手踭，一定會收番錢。其實我真係好開心，佢真係可以做到一個真正白雪公主，搵到佢白馬王子，佢事業已經好好啦，20幾歲，佢愛情都係我哋咁多朋友面前跑出晒，仲要好開心，好光明正大，好感動，成件事好難，呢個年代搵一個無悔、好純潔嘅愛情係好難，所以真係好開心，我都會加把勁。」

全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2VKESPM

《Captain Marvel》完全導讀本
足料78頁 深度解構最強英雄！
https://bit.ly/2VyXIt2

第二屆最港電影大獎投票網址
https://bit.ly/thekongestfilmawards2018